لاہور (نیوزڈیسک) احتساب عدالت نے آشیانہ اقبال ریفرنس میں سابق وزیراعظم شہبازشریف سمیت تمام ملزمان کو بری کردیا، بری ہونے والے ملزمان میں احدچیمہ اور فواد حسن فواد بھی شامل ہیں۔
تفصیلات کے مطابق احتساب عدالت میں آشیانہ اقبال ریفرنس میں سابق وزیراعظم شہبازشریف اور دیگر کی بریت کی درخواستوں پر سماعت ہوئی۔
عدالت نے آشیانہ ہاؤسنگ کیس کا فیصلہ سنایا دیا ، احتساب عدالت کےجج علی ذوالقرنین اعوان نےفیصلہ سنایا ، فیصلے میں شہبازشریف سمیت تمام ملزمان کو بری کردیا گیا۔
احتساب عدالت نے احدچیمہ اورفوادحسن فوادکوبھی بری کردیا جبکہ شریک ملزمان منیر ضیااورامتیازحیدر ، بلال قدوائی ،سجادبھٹہ اور شاہدمحمود کی بریت کی درخواست بھی منظور کرلی۔
اس سے قبل آشیانہ اقبال ریفرنس کی سماعت میں نیب پراسیکیوشن نے سپریم کورٹ کےفیصلےکی تشریح احتساب عدالت میں جمع کرائی تھی، جس میں کہا تھا کہ آشیانہ اقبال ان کیسز میں سے ہے جن کافیصلہ سنانےسےسپریم کورٹ نےمنع نہیں کیا، نیب نے اٹارنی جنرل آف پاکستان منصورعثمان اعوان سے رائے مانگی، اٹارنی جنرل آف پاکستان سےمشاورت کرکے رپورٹ جمع کرائی ہے۔
پراسیکیوٹر کا کہنا تھا کہ سپریم کورٹ حکم ان کیسزسےمتعلق ہےجوعدالتوں سےنیب کوواپس بھجوائےگئے، سپریم کورٹ کے فیصلے کے بعد ان کیسزکوواپس عدالتوں میں بحال کیا گیا،آشیانہ اقبال ریفرنس ان کیسز میں شامل نہیں ہے۔
جس پر فاضل جج نے کہا کہ آشیانہ اقبال ریفرنس پر عدالت آج ہی فیصلہ سنائےگی، وکلا کچھ دیر انتظار کریں۔
خیال رہے عدالت نے نیب حکام سے سپریم کورٹ کے فیصلے کی تشریح اوروضاحت مانگی تھی اور احتساب عدالت نے بریت کی درخواستوں پر فیصلہ محفوظ کر رکھا تھا۔
