امریکہ میں مصنوعی ذہانت پر کانفرنس کے دوران مشکوک ڈیوائس نصب کرنے پر سعودی باشندہ گرفتار

امریکا: امریکی حکام نے مصنوعی ذہانت کی معروف کمپنی اوپن اے آئی کے 35 سالہ سعودی نژاد انجینئر عبدالرحمان الفوزان کو دفتر میں خفیہ آڈیو ریکارڈنگ ڈیوائس نصب کرنے کے الزام میں گرفتار کر لیا ہے۔ ملزم کو وفاقی عدالت میں پیش کیا گیا، جہاں سے متعلقہ کارروائی کے لیے 19 اکتوبر کی تاریخ مقرر کیے جانے کی اطلاع ہے۔
امریکی محکمہ انصاف کی جانب سے سامنے آنے والی شکایت کے مطابق، الفوزان جولائی 2025 سے اوپن اے آئی میں بطور انجینئر کام کر رہے تھے۔ الزام ہے کہ انہوں نے ستمبر 2026 کے اواخر میں سان فرانسسکو میں کمپنی کے ایک اہم اجلاس والے کمرے میں ٹیلی ویژن کے پیچھے موجود یو ایس بی پورٹ میں خفیہ ریکارڈنگ ڈیوائس نصب کی تھی۔ یہ آلہ 30 ستمبر کو دریافت ہوا، جسے مبینہ طور پر ٹوائلٹ پیپر میں چھپایا گیا تھا۔
تحقیقاتی دستاویزات کے مطابق، دفتر میں نصب نگرانی کے کیمروں کی فوٹیج میں ملزم کو متعدد مرتبہ اس کمرے کے قریب دیکھا گیا، حالانکہ انہیں وہاں داخلے یا اجلاسوں میں شرکت کی اجازت نہیں تھی۔ حکام کا کہنا ہے کہ اس کمرے میں کمپنی کی خفیہ تحقیق، نئی مصنوعات کے منصوبوں، تکنیکی صلاحیتوں، تجارتی حکمت عملی اور دیگر اہم معاملات پر گفتگو کی جاتی تھی۔
شکایت میں یہ الزام بھی عائد کیا گیا ہے کہ ملزم نے کمپنی کی عمارتوں، اجلاس کے کمروں اور اعلیٰ عہدیداروں کی ملاقاتوں کے مقامات سے متعلق معلومات حاصل کرنے کی کوشش کی۔ مزید یہ کہ ان کے شریک حیات سے منسلک ایک چیٹ بوٹ اکاؤنٹ پر خفیہ ریکارڈنگ ڈیوائس تیار کرنے، اسے چھپانے، آواز ریکارڈ کرنے، معلومات کو خفیہ رکھنے اور دور سے رسائی حاصل کرنے سے متعلق سوالات کیے گئے تھے۔

NEWS RELEASE out of @FBISanFrancisco: Saudi National Arrested for Installing Surreptitious Audio Recording Device at San Francisco Super Intelligence Company

Read more about how this #FBI is protecting American businesses and defending national security. https://t.co/whUZzwwH6q pic.twitter.com/nfUGfgXl15

— FBI (@FBI) October 13, 2026

دستاویزات کے مطابق، 5 اکتوبر کو ملزم کو دوبارہ اسی اجلاس والے کمرے میں ٹیلی ویژن کے پیچھے دیکھتے ہوئے ریکارڈ کیا گیا۔ اسی روز کمپنی کے سکیورٹی اہلکاروں نے ایک دوسرے کمرے میں چھوڑے گئے ان کے بیگ سے بھی ایک ایسی ڈیوائس برآمد کرنے کا دعویٰ کیا جو پہلے ملنے والے آلے سے مشابہت رکھتی تھی۔
امریکی حکام نے اس معاملے کو جدید مصنوعی ذہانت کی ٹیکنالوجی اور قومی سلامتی کے تحفظ سے متعلق اہم قرار دیا ہے۔ اوپن اے آئی نے بھی واقعے کی اطلاع متعلقہ حکام کو دی اور ملزم کو ملازمت سے برطرف کر دیا۔
حکام کے مطابق، ملزم کے خلاف الزامات کی تحقیقات جاری ہیں۔ تاہم، تاحال ان الزامات کا عدالت میں ثابت ہونا باقی ہے۔