گیری کرسٹن کی مارگلہ ہلز میں ماؤنٹین بائیکنگ

سری لنکا کرکٹ ٹیم کے ہیڈ کوچ اور سابق جنوبی افریقی ٹیسٹ کرکٹر گیری کرسٹن نے اسلام آباد کی مارگلہ ہلز میں ماؤنٹین بائیکنگ کے خوب مزے لیے اور قدرتی مناظر سے لطف اندوز ہوئے۔

گیری کرسٹن کا کہنا ہے کہ وہ ماؤنٹین بائیکنگ کی اجازت ملنے پر شکر گزار ہیں یہ ان کا پسندیدہ مشغلہ ہے اور انہیں اس کے ذریعے قدرتی مناظر کو قریب سے دیکھنے کا موقع ملتا ہے۔

سری لنکن ہیڈ کوچ نے مزید کہا کہ مارگلہ ہلز انتہائی شاندار ہیں اور یہاں ماؤنٹین بائیکنگ کا تجربہ بہت خوشگوار رہا۔

بائیکنگ کے دوران انہوں نے کئی پہاڑ دیکھے اور علاقے کے خوبصورت لینڈ اسکیپ کو سراہا۔

سابق جنوبی افریقی کرکٹر کا کہنا تھا کہ ماؤنٹین بائیکنگ کے ذریعے کسی بھی ملک کو دیکھنے اور اس کے قدرتی حسن سے لطف اندوز ہونے کا منفرد موقع ملتا ہے، جو ایک اچھا تجربہ ہوتا ہے۔

گیری کرسٹن نے بتایا کہ وہ صبح جلد اٹھنے کے عادی ہیں اور عموماً صبح 8 سے 9 بجے تک اپنی بائیکنگ مکمل کر لیتے ہیں۔

اُن کا یہ بھی کہنا تھا کہ پاکستان کے پہاڑ بہت شاندار ہیں، خصوصاً شمالی علاقوں کے پہاڑ، اگر انہیں شمالی علاقوں کا دورہ کرنے کے لیے ایک یا 2 دن بھی مل جائیں تو وہ وہاں جانا پسند کریں گے۔