پاک سوزوکی نے گاڑیوں کی قیمت میں ایک لاکھ روپے سے زائد کا اضافہ کردیا۔
ڈیلرز کو فراہم کی جانے والی نئی قیمتوں کی فہرست کے مطابق گاڑیوں کی قیمت میں 80 ہزار سے ایک لاکھ 80 ہزار روپے تک اضافہ کیا جارہا ہے۔ نئی قیمتوں کا اطلاق یکم مارچ 2024 سے ہوگا۔
سب سے زیادہ اضافہ کلٹس اے جی ایس کی قیمت میں کیا گیا ہے۔ ایک لاکھ 80 ہزار روپے اضافے کے بعد یہ گاڑی اب 45 لاکھ 46 ہزار روپے میں ملے گی۔
ترجمان کے مطابق ایک طرف افراطِ زر کی شرح بہت بلند ہے اور دوسری طرف اوور ہیڈ اخراجات میں بھی اضافہ ہوگیا ہے۔ ایسے میں قیمتیں بڑھانا ناگزیر ہوچکا تھا۔
کمپنی حکام کے مطابق درآمد کیے جانے والے خام مال کی قیمت بھی بڑھ گئی ہے، ایسیسریز بھی مہنگی پڑ رہی ہیں۔ شپمنٹ کے اخراجات بھی بڑھ گئے ہیں۔ افراطِ زر کی بلند شرح اور اوور ہیڈ اخراجات بھی قیمتوں میں اضافے کا سبب ہیں۔
تجزیہ کاروں کا کہنا ہے کہ 40 لاکھ سے زائد مالیت کی کاروں پر جنرل سیلز ٹیکس 18 فیصد سے بڑھاکر 25 فیصد کیے جانے کے منفی اثرات سے نپٹنے کے لیے قیمتیں بڑھائی گئی ہیں۔
یاد رہے کہ حکومت نے 14 سی سی تک کی گاڑیوں پر جنرل سیلز ٹیکس میں 23 مارچ سے اضافے کا اعلان کیا ہے۔ اس بار 40 لاکھ سے زائد مالیت کی گاڑیوں کو بھی شامل کیا گیا ہے۔ اس کیٹیگری میں کلٹس اور سوئفٹ کے بعض ماڈل بھی آتے ہیں۔
