وزیراعلیٰ کا مردان کیلئے 50 ارب کے ترقیاتی پیکیج کا اعلان

وزیراعلیٰ خیبرپختونخوا سہیل آفریدی نے مردان کےلیے 50 ارب کے ترقیاتی پیکیج کا اعلان کردیا۔

مردان میں پی ٹی آئی جلسے سے چیئرمین بیرسٹر گوہر، مرکزی رہنما اسد قیصر اور سہیل آفریدی نے خطاب کیا ۔

سہیل آفریدی نے کہا کہ بانی پی ٹی آئی کے حکم پر ہی تحریک چلائیں گے، دن کی روشنی میں جلسہ کیا ہے تاکہ لوگ مقبولیت کو دیکھ لیں۔

انہوں نے کہا کہ کامیاب جلسے نے بانی کی مقبولیت کو ثابت کردیا ہے، مردان کے لیے 50 ارب کے ترقیاتی پیکیج کا اعلان کرتا ہوں۔

وزیراعلیٰ خیبر پختونخوا نے مزید کہا کہ بانی پی ٹی آئی اور ان کی اہلیہ کو اسپتال منتقل کرنے تک احتجاج جاری رکھیں گے۔ بانی پی ٹی آئی، ان کی اہلیہ اور خاندان کے ساتھ ظلم ہو رہا ہے۔

اسد قیصر نے کہا کہ 26 یا 27ویں ترمیم کومانیں گے نہ ہی 28ویں ترمیم کو ہونے دیں گے، ناجائز طور پر اقتدار حاصل کرنے والوں کے دن گنے جاچکے ہیں۔

بیرسٹر گوہر نے کہا کہ بانی کو ناحق جیل میں رکھا گیا ہے، بشریٰ بی بی کا بھی توشہ خانہ کیس کے ساتھ کوئی تعلق نہیں، انہیں مناسب علاج کےلیے اسپتال منتقل کیا جائے۔