نقل و بد انتظامی پر میٹرک بورڈ کراچی کے 3 افسران معطل

کراچی میں میٹرک امتحانات کے دوران نقل و بد انتظامی پر سندھ حکومت نے میٹرک بورڈ کے 3 افسران کو معطل کردیا، جس کا نوٹیفکیشن بھی جاری کردیا گیا۔

ذرائع کا کہنا ہے کہ تینوں افسران کو چیئرمین و سیکریٹری بورڈ کی فراہم کردہ معلومات پر معطل کیا گیا۔

ذرائع کا مزید کہنا ہے کہ افسران کو امتحانی مراکز کی تبدیلی اور اسکولوں کی پوسٹنگ کا ذمہ دار قرار دیا گیا ہے۔

واضح رہے کہ کراچی میں ثانوی میٹرک بورڈ کے تحت نویں اور دسویں کے امتحانات جاری ہیں۔

شفاف امتحانات کے حوالے سے میٹرک بورڈ انتظامیہ کے دعوے دھرے کے دھرے رہ گئے۔ نویں جماعت کا انگریزی کا پرچہ امتحان سے آدھا گھنٹہ قبل ہی آؤٹ ہوگیا تھا۔