عالمی منڈیوں میں تیل کی قیمتیں بڑھ گئیں

اسلام آباد (نیوز ڈ یسک)امریکا اور ایران کے درمیان کسی پیش رفت نہ ہونے اور آبنائے ہرمز کی ممکنہ بندش کے خدشات نے عالمی سطح پر کشیدگی میں اضافہ کر دیا ہے،

جس کے اثرات تیل کی قیمتوں پر بھی نمایاں ہو رہے ہیں۔بین الاقوامی منڈی میں خام تیل کی قیمتیں مسلسل اوپر جا رہی ہیں اور اسی کے ساتھ پیٹرولیم مصنوعات بھی مہنگی ہوتی دکھائی دے رہی ہیں۔ تازہ اعداد و شمار کے مطابق برینٹ خام تیل کی قیمت میں 3 فیصد سے زائد اضافہ ہوا ہے، جس کے بعد یہ 101.46 ڈالر فی بیرل تک پہنچ گیا ہے، جبکہ ویسٹ ٹیکساس انٹرمیڈیٹ (WTI) بھی تقریباً 2.87 فیصد اضافے کے ساتھ 92.24 ڈالر فی بیرل ہو گیا ہے۔

اسی طرح ابوظہبی کا مربان کروڈ بھی نمایاں مہنگا ہوا ہے اور اس کی قیمت 4.88 فیصد اضافے کے بعد 100.99 ڈالر فی بیرل تک جا پہنچی ہے۔بین الاقوامی خبر رساں ادارے کے مطابق خام تیل کی بڑھتی ہوئی قیمتیں اس بات کی نشاندہی کرتی ہیں کہ دنیا بھر میں پیٹرولیم مصنوعات مزید مہنگی ہونے کا امکان موجود ہے، جبکہ برینٹ کروڈ کی قیمت میں 3 ڈالر سے زائد اضافہ اس رجحان کو مزید واضح کرتا ہے۔