اوکاڑہ: 3 ملزمان کی لڑکی کے ساتھ گن پوائنٹ پر نازیبا حرکات، اہلخانہ کو ہراساں بھی کیا

اوکاڑہ میں سیٹھ کالونی کے علاقے میں موٹرسائیکل سوار 3 افراد کی جانب سے ایک لڑکی کے ساتھ مبینہ نازیبا حرکات کرنے کا معاملہ سامنے آیا ہے، جس پر پولیس نے کارروائی کا آغاز کر دیا۔

متاثرہ لڑکی کے والد کی جانب سے پولیس کو دی گئی درخواست میں مؤقف اختیار کیا گیا ہے کہ 25 مارچ 2026 کو ایک ملزم نے اپنے دو ساتھیوں کے ہمراہ گن پوائنٹ پر ان کی بیٹی کے ساتھ نازیبا حرکات کیں۔ 

درخواست کے مطابق واقعے کی سی سی ٹی وی فوٹیج بھی موجود ہے۔

متاثرہ خاندان کا کہنا ہے کہ ابتدائی طور پر خوف و ہراس کے باعث ملزمان کے خلاف قانونی کارروائی نہیں کی گئی، تاہم بعد ازاں بار بار منع کرنے کے باوجود ملزمان کی جانب سے ہراساں کرنے کا سلسلہ جاری رہا۔

درخواست میں مزید بتایا گیا ہے کہ واقعے کے دوران موقع پر موجود افراد نے مداخلت کر کے متاثرہ خاندان کو ملزمان سے نجات دلائی۔

دوسری جانب ڈسٹرکٹ پولیس آفیسر (ڈی پی او) ڈاکٹر اسد اعجاز ملہی نے واقعے کا نوٹس لیتے ہوئے متعلقہ حکام کو ملزمان کی جلد از جلد گرفتاری اور قانونی کارروائی یقینی بنانے کی ہدایت جاری کر دی ہے۔