پابندی کے بعد تین نئے ڈنکی روٹس سے پاکستانیوں کو بیرون ملک بھیجنے کا انکشاف

اسلام آباد (پی این پی)پاکستان سے غیر قانونی طریقے سے بیرون ملک جانے کیلئے انسانی سمگلروں نے ڈنکی کیلئے تین نئے راستے تلاش کرلئے۔

ذرائع کے مطابق ڈنکی کے پرانے راستوں پر سخت پابندیوں کے بعد انسانی اسمگلروں نے ملائیشیا، آذربائیجان، مصر،ازبکستان، بیلاروس کیلئے 3نئے روٹس تلاش کیے ہیں۔ ایف آئی اے ذرائع کے مطابق پکڑے جانیوالے انسانی سمگلروں نے نئے روٹس بتاتے ہوئے انکشاف کیا کہ انسانی سمگلرز پاکستانیوں کو ویزے پر ملائیشیا لے جاتے ہیں پھر سے وہاں سے مصر،لیبیا اور پھر یورپ میں داخل کرایا جاتا ہے۔ذرائع کے مطابق ڈنکی لگانے کا دوسرا نیا روٹ ازبکستان سے ہوکر جاتا ہے، جس کیلئے انسانی اسمگلر پاکستانی نوجوانوں کو ویزا لگوا کر پہلے ازبکستان لے جاتے ہیں پھر وہاں سے بیلا روس اور پولینڈ میں داخل کروایا جاتا ہے۔ذرائع کے مطابق پولینڈ سرحد دشوار گزار زمینی راستے کے ذریعے پار کرائی جاتی ہے۔

ایف آئی اے ذرائع کے مطابق انسانی سمگلر تیسرے روٹ میں نوجوانوں کو موریطانیہ اور سینیگال بلوا کر کشتیوں پر نوجوانوں کوسپین کے نیم خودمختار جزیروں پر پہنچاتے ہیں پھر کینری آئی لینڈز سے نوجوانوں کو غیرقانونی طور پر سپین لے جایا جاتا ہے۔ذرائع کے مطابق نئے روٹس کے انکشاف پر ان ممالک میں جانیوالے شہریوں کی سکریننگ سخت کردی گئی ہے جبکہ ایف آئی اے ان ممالک کو جانیوالے نوجوانوں سے خصوصی تفتیش کرتا ہے۔ذرائع کے مطابق ڈنکی کا شک پڑنے پر ایسے نوجوانوں کو آف لوڈ کردیا جاتا ہے اور اب تک درجنوں نوجوانوں کو آف لوڈ کیا گیا ہے۔