بھارت میں اگلے ماہ شروع ہونے والے ورلڈ کپ کا شائقین کو بے صبری سے انتظار ہے مگر بد قسمتی سے جنوبی افریقہ کے دو اہم کھلاڑی ایونٹ سے چند روز قبل انجری کا شکار ہو کر ایونٹ سے باہر ہو گئے۔
تفصیلات کے مطابق فاسٹ بولر اینریچ نورکیا اور سیسانڈا مگالا ورلڈ کپ سے باہر ہوگئے، کرکٹ ساؤتھ افریقہ نے کھلاڑیوں کی ورلڈ کپ سے باہر ہونے کی تصدیق کر دی جبکہ اینڈائل فلک وایو اور لیزاڈ ولیمز کو ان کے متبادل کے طور پر ورلڈ کپ اسکواڈ میں شامل کر لیا گیا۔
یاد رہے کہ آئی سی سی ورلڈ کپ شروع ہونے میں 14 روز باقی ہیں لیکن پاکستان سمیت دنیا کی کئی ٹاپ ٹیموں کو کھلاڑیوں کے فٹنس مسائل نے گھیر لیا ہے۔
جیسے جیسے ورلڈ کپ کا انعقاد قریب آ رہا ہے ویسے ویسے اس میں شریک ٹیموں کی مشکلات بھی بڑھتی جا رہی ہیں۔
صرف پاکستان ہی نہیں بلکہ میزبان بھارت سمیت دفاعی چیمپئن انگلینڈ، آسٹریلیا، نیوزی لینڈ، جنوبی افریقی کی ٹیمیں بھی اپنے اہم کھلاڑیوں کی اس بڑے ایونٹ کے موقع پر انجریز سے پریشان ہیں اور ان کے میگا ایونٹ میں شرکت پر سوالیہ نشان لگ گیا ہے۔
