حوثی حملوں کے باوجود سعودی آرامکو کی پیداوار برقرار، منافع میں 44 فیصد اضافہ

ریاض: سعودی عرب کی سرکاری آئل کمپنی سعودی آرامکو نے کہا ہے کہ یمن کے حوثی گروپ کی جانب سے کیے گئے حملوں کے باوجود کمپنی کی تیل کی پیداوار اور آپریشنل سرگرمیاں معمول کے مطابق جاری رہیں۔

سعودی آرامکو کے صدر اور چیف ایگزیکٹو آفیسر امین ایچ ناصر نے میڈیا سے گفتگو کرتے ہوئے بتایا کہ جولائی کے دوران بحیرہ احمر کے ساحلی علاقوں سمیت کمپنی کی بعض تنصیبات کو نشانہ بنانے کی کوشش کی گئی، تاہم ان حملوں سے تیل کی پیداوار یا آپریشنل صلاحیت پر کوئی نمایاں اثر نہیں پڑا۔

انہوں نے کہا کہ کمپنی نے اپنی تنصیبات کے تحفظ، توانائی کی مسلسل فراہمی اور آپریشنز کی بلا تعطل انجام دہی کے لیے مؤثر حفاظتی اقدامات کر رکھے ہیں، جس کے باعث تمام سرگرمیاں معمول کے مطابق جاری رہیں۔

امین ایچ ناصر کے مطابق خطے میں جاری کشیدگی کے باوجود سعودی آرامکو نے مضبوط مالی نتائج حاصل کیے ہیں اور اس عرصے کے دوران کمپنی کے منافع میں تقریباً 44 فیصد اضافہ ریکارڈ کیا گیا۔

انہوں نے کہا کہ کمپنی عالمی توانائی کی منڈی میں اپنی مضبوط پوزیشن برقرار رکھنے کے ساتھ ساتھ تیل کی مسلسل فراہمی کو یقینی بنانے کے لیے پرعزم ہے۔

توانائی کے ماہرین کے مطابق مشرقِ وسطیٰ میں سکیورٹی خدشات کے باوجود سعودی آرامکو کی مستحکم پیداوار عالمی تیل کی منڈی میں استحکام برقرار رکھنے میں اہم کردار ادا کر رہی ہے، جبکہ کمپنی کی مالی کارکردگی سرمایہ کاروں کے اعتماد کی بھی عکاسی کرتی ہے۔