اسرائیلی سیکیورٹی میں درجنوں یہودی آبادکاروں کا مسجد اقصیٰ پر دھاوا

مقبوضہ بیت المقدس: درجنوں یہودی آبادکار اسرائیلی پولیس اور سیکیورٹی اہلکاروں کی سخت نگرانی میں مسجد اقصیٰ کے صحنوں میں داخل ہوگئے۔ اس دوران آبادکاروں کی جانب سے مذہبی رسومات ادا کیے جانے کی اطلاعات سامنے آئی ہیں۔

فلسطینی ذرائع کے مطابق 116 یہودی آبادکار سخت سیکیورٹی حصار میں مسجد اقصیٰ کے احاطے میں داخل ہوئے اور مختلف مقامات پر گشت کیا۔

رپورٹ کے مطابق آبادکار مسجد اقصیٰ میں باب المغاربہ کے راستے داخل ہوئے، جہاں اسرائیلی پولیس اور مسلح سیکیورٹی اہلکار ان کے ہمراہ موجود تھے۔ بعد ازاں وہ مخصوص راستوں سے مسجد کے احاطے سے باہر نکل گئے۔

فلسطینی ذرائع کا کہنا ہے کہ اس موقع پر اسرائیلی پولیس نے مسجد اقصیٰ آنے والے فلسطینی نمازیوں اور نوجوانوں پر بھی مختلف پابندیاں عائد کیں، جبکہ بعض افراد کو مسجد میں داخل ہونے سے روک دیا گیا۔

رپورٹ میں مزید بتایا گیا کہ آبادکاروں کے دورے کے دوران مسجد اقصیٰ کے بیرونی دروازوں پر بعض فلسطینیوں کے شناختی کارڈ بھی تحویل میں لیے گئے۔

فلسطینی حکام اور ذرائع کی جانب سے مسجد اقصیٰ میں آبادکاروں کی آمد اور فلسطینی نمازیوں پر پابندیوں پر تشویش کا اظہار کیا گیا ہے۔