پمز ہسپتال میں جاں بحق بچے شاپنگ بیگ میں والدین کو دیئے گئے، کہا گیا کسی کو بتانا نہیں

اسلام آباد (پی این پی) سینیٹر فلک ناز چترالی نے پمز ہسپتال میں پیش آنے والے واقعے پر شدید تحفظات کا اظہار کرتے ہوئے دعویٰ کیا ہے کہ

جاں بحق ہونے والے بچوں کی میتیں والدین کے حوالے کرتے وقت انہیں شاپنگ بیگز میں رکھا گیا اور اہلخانہ کو اس معاملے کا ذکر نہ کرنے کی ہدایت کی گئی۔

سینیٹ اجلاس میں اظہار خیال کرتے ہوئے فلک ناز چترالی نے وفاقی وزیر صحت کی جانب سے پمز ہسپتال کی کارکردگی کو سراہنے پر سخت ردعمل دیا۔ ان کا کہنا تھا کہ جس صورتحال کا انہوں نے خود مشاہدہ کیا، اس کے بعد ہسپتال کی تعریف کرنا انتہائی افسوسناک ہے۔

سینیٹر فلک ناز چترالی کے مطابق وہ واقعے کے روز پمز ہسپتال پہنچی تھیں، تاہم وہاں موجود سیکیورٹی اہلکاروں نے مبینہ طور پر انہیں دھکے دے کر باہر نکال دیا۔ انہوں نے دعویٰ کیا کہ جاں بحق بچوں کو شاپنگ بیگز میں والدین کے حوالے کیا گیا اور اہلخانہ سے کہا گیا کہ اس بارے میں کسی کو آگاہ نہ کریں۔

انہوں نے حکومت اور وفاقی وزیر صحت کو واقعے کا ذمہ دار قرار دیتے ہوئے کہا کہ اسلام آباد کے صرف دو بڑے ہسپتالوں کا انتظام بھی مؤثر انداز میں نہیں چلایا جا رہا۔ ان کے مطابق موجودہ صورتحال پر حکومت کو جواب دینا چاہیے۔

فلک ناز چترالی کی تقریر کے دوران مسلم لیگ (ن) اور متحدہ قومی موومنٹ (ایم کیو ایم) سے تعلق رکھنے والے سینیٹرز کی جانب سے احتجاج بھی کیا گیا، جس کے باعث ایوان میں صورتحال کشیدہ ہوگئی۔