فراڈکاالزام،حسینہ واجد کی بیٹی ڈبلیو ایچ او کے عہدے سے مستعفی

جنیوا: بنگلہ دیش کی سابق وزیراعظم شیخ حسینہ واجد کی بیٹی صائمہ واجد نے عالمی ادارۂ صحت (ڈبلیو ایچ او) کے جنوب مشرقی ایشیا کی علاقائی ڈائریکٹر کے عہدے سے استعفیٰ دے دیا ہے۔

صائمہ واجد کا استعفیٰ 9 ستمبر 2026 کو سامنے آیا۔ یہ پیش رفت ایسے وقت میں ہوئی ہے جب ڈبلیو ایچ او اور بنگلہ دیشی حکام کی جانب سے ان سے متعلق بعض معاملات کی تحقیقات جاری ہیں۔

رپورٹس کے مطابق تحقیقات میں چین کے سفر کے اخراجات سے متعلق مبینہ مالی بے ضابطگی، تعلیمی اسناد سے متعلق مبینہ غلط معلومات اور بنگلہ دیش میں زمین کے حصول سے جڑے معاملات شامل ہیں۔

صائمہ واجد نے اپنے خلاف عائد الزامات کو مسترد کیا ہے۔ سفری اخراجات سے متعلق معاملے پر ان کا مؤقف ہے کہ یہ عملے کی جانب سے ہونے والی انتظامی غلطی کا نتیجہ تھا۔

رپورٹ کے مطابق صائمہ واجد 2025 سے بغیر تنخواہ انتظامی رخصت پر تھیں۔ ان کے استعفے کے بعد ڈبلیو ایچ او کے علاقائی دفتر سے متعلق آئندہ انتظامی اقدامات پر توجہ مرکوز کی جا رہی ہے۔