اسلام آباد: قومی احتساب بیورو (نیب) نے سابق معاونِ خصوصی ذوالفی بخاری کی 800 کنال سے زائد زرعی اراضی نیلام کرنے کا فیصلہ کرلیا ہے۔
اسسٹنٹ کمشنر تحصیل جنڈ، ضلع اٹک نے اس حوالے سے نیلامی کا اشتہار جاری کردیا۔اشتہار کے مطابق اراضی کی نیلامی یکم اکتوبر صبح 11 بجے میونسپل دفتر جنڈ میں کی جائے گی۔
نیلامی کے احکامات ڈپٹی ڈائریکٹر کوآرڈ انویسٹی گیشن ونگ نے جاری کیے ہیں۔دستاویزات کے مطابق نیلامی کے لیے پیش کی گئی زرعی زمین دو حصوں پر مشتمل ہے، جس میں ایک رقبہ 771 کنال 9 مرلے جبکہ دوسرا 25 کنال 7 مرلے پر مشتمل ہے۔واضح رہے کہ ذوالفی بخاری 190 ملین پاؤنڈ کیس میں عدالت کی جانب سے اشتہاری قرار دیے جاچکے ہیں۔
