آئی سی سی آئی کاروباری برادری کی مضبوط آواز کے طور پر کام کرتا رہے گا، سردار طاہر محمود
اسلام آباد(نعیم اختر)اسلام آباد چیمبر آف کامرس اینڈ انڈسٹری (آئی سی سی آئی) کے صدر سردار طاہر محمود نے کہا ہے کہ سرمایہ کاری، صنعتی ترقی اور روزگار کی تخلیق کو فروغ دینے والے مستحکم اور سازگار ماحول کی فراہمی کی وکالت آئی سی سی آئی جاری رکھے گا اور کاروباری برادری کی مضبوط آواز کے طور پر کام کرتا رہے گا ۔ان خیالات کا اظہار انہوں نے پاکستان ایسوسی ایشن آف لارج سٹیل پروڈیوسرز (پی اے ایل ایس پی) کے چیئرمین جاوید اقبال کی قیادت میں گیارہ رکنی وفد سے گفتگو کرتے ہوئے کیا۔ وفد میں سرپرست اعلیٰ عباس اکبرعلی، وائس چیئرمین الیاس عزیز ملک، سیکرٹری جنرل واجد بخاری اور دیگر سینئر ممبران شامل تھے۔
آئی سی سی آئی کی جانب سے سینئر نائب صدر طاہر ایوب، نائب صدر عرفان چوہدری، کونسل ممبر چوہدری مسعود اور ایگزیکٹو ممبر عمیر عزیز ملک بھی موجود تھے۔سردار طاہر محمود نے اس بات پر زور دیا کہ پائیدار معاشی ترقی صرف حکومت، نجی شعبے اور ریگولیٹری اداروں کے درمیان ہم آہنگ پالیسیوں سے حاصل کی جا سکتی ہے۔ انہوں نے اعلان کیا کہ آئی سی سی آئی بڑے کاروباری سٹیک ہولڈرز کے ساتھ مشاورت سے ایک جامع ورکنگ پیپر تیار کرنے کے لیے نومبر کے آخر یا دسمبر کے شروع میں ایک "آل چیمبرز پریذیڈنٹ کنکلیو” منعقد کرنے کا منصوبہ بنا رہا ہے۔
یہ دستاویز حکومت کو طویل مدتی اور ترقی پر مبنی اقتصادی پالیسیاں بنانے کی تجویز کے طور پر پیش کی جائے گی جو تمام صنعتوں کے لیے برابری کا میدان یقینی بنائے گی۔انہوں نے یقین دلایا کہ آئی سی سی آئی کاروباری برادری کی مضبوط آواز کے طور پر کام کرتا رہے گا اور پی اے ایل ایس پی جیسی صنعتی انجمنوں کے ساتھ مل کر کام کرے گا تاکہ ایسی اصلاحات کی وکالت کرے جو صنعتی بنیاد کو مضبوط کریں، روزگار پیدا کریں اور قومی اقتصادی استحکام کو بڑھا سکیں۔ملاقات میں پی اے ایل ایس پی کے چیئرمین جاوید اقبال نے کہا کہ پاکستان کے مینوفیکچرنگ سیکٹر کے تحفظ کے لیے واضح اور معاون صنعتی پالیسیوں کی ضرورت ہے، موجودہ حکومت تاجروں کو مزید سہولیات فراہم کرے۔