چین کی متحدہ عرب امارات کے قومی سلامتی سے متعلق جائز مطالبات کی حمایت

بیجنگ : چین کے وزیرِ خارجہ وانگ ای نے متحدہ عرب امارات کے نائب وزیرِاعظم و وزیرِ خارجہ عبداللہ بن زاید النہیان سے ٹیلیفون پر گفتگو کی۔جمعرات کے روز وانگ ای نے ایران کی موجودہ صورتحال پر چین کے اصولی مؤقف کا اعادہ کرتے ہوئے کہا کہ جنگ کا پھیلاؤ کسی بھی فریق کے مفاد میں نہیں، اس کا اصل نقصان خطے کے عوام کو ہوتا ہے۔ انہوں نے اس بات پر زور دیا کہ تنازع کے دوران شہریوں کے تحفظ کی سرخ لکیر ہرگز عبور نہیں ہونی چاہیے، توانائی، معیشت اور عوامی زندگی سے متعلق غیر فوجی اہداف کو نشانہ نہیں بنایا جانا چاہیے، جبکہ بحری گزرگاہوں کی سلامتی کو یقینی بنانا ناگزیر ہے۔ انہوں نے کہا کہ متحدہ عرب امارات نے جنگ سے قبل امن کے لیے سفارتی کوششیں کیں، جبکہ خلیج تعاون کونسل کے خصوصی وزرائے خارجہ اجلاس میں بھی حال ہی میں اس بات پر زور دیا گیا کہ موجودہ بحران پر قابو پانے اور علاقائی سلامتی کے تحفظ کا واحد راستہ مکالمہ اور سفارت کاری ہے۔ چین نے اس مؤقف کو سراہا ہے۔ وانگ ای نے کہا کہ چین متحدہ عرب امارات کے قومی سلامتی سے متعلق جائز مطالبات کی حمایت کرتا ہے اور علاقائی ممالک کی جانب سے سفارتی ذرائع سے تنازعات حل کرنے کی مسلسل کوششوں کی تائید کرتا ہے۔ انہوں نے واضح کیا کہ چین امن کی امید ترک نہیں کرے گا، تعمیری کردار ادا کرتا رہے گا اور مشرقِ وسطیٰ کے مسئلے پر خصوصی ایلچی کو خطے میں مصالحتی مشن پر بھیجے گا تاکہ خطہ دوبارہ امن و استحکام کی راہ پر گامزن ہو سکے۔ انہوں نے امید ظاہر کی کہ متحدہ عرب امارات میں مقیم چینی شہریوں اور اداروں کی سلامتی کے تحفظ کو یقینی بنایا جائے گا۔