اسلام آباد(ویب ڈیسک)اسلام آباد چیمبرز اینڈ کامرس انڈسٹری کے صدر احسن ظفر بختاوری نے ایف پی سی سی آئی کے الیکشن میں تاریخی کامیابی پر نومنتخب صدر عاطف اکرام شیخ اور پوری یو بی جی کو مبارکباد پیش کرتے ہوئے کہا ہے کہ فیڈریشن کے انتخابات کا مرحلہ پر امن طریقے سے مکمل ہوا جس پر پوری بزنس کمیونٹی خراج تحسین کی مستحق ہے۔
اپنے ایک بیان میں صدر آئی سی سی آئی نے کہا کہ بزنس کمیونٹی نے ایف پی سی سی آئی کے الیکشن میں عاطف اکرام شیخ اور یو بی جی کی صورت میں بہترین قیادت کا انتخاب کیا ہے، ملک اس وقت مشکل معاشی صورتحال سے گزر رہا ہے، معاشی بحران سے نمٹنے کیلئے ضروری ہے کہ بزنس کمیونٹی کی باصلاحیت قیادت کو آگے لایا جائے، عاطف اکرام شیخ بزنس کمیونٹی کے مسائل سے پوری طرح آگاہ ہیں،
امید ہے نومنتخب صدر آئی سی سی آئی عاطف اکرام شیخ بزنس کمیونٹی کے مسائل حکومت کے سامنے رکھیں گے،معاشی بحران سے نکلنے کیلئے بزنس کمیونٹی کو پالیسی سازی میں شامل کرنے کی ضرورت ہے،
احسن بختاوری نے کہا کہ عاطف اکرام شیخ بزنس کمیونٹی کی بہترین چوائس کے طور پر سامنے آئے ہیں، امید ہے عاطف اکرام شیخ اور یو بی جی کی قیادت بزنس کمیونٹی کی توقعات پر پورا اترے گی۔
