ہار جیت سے کوئی غرض نہیں ،ہماری سیاست کا واحد مقصد عوام کی خدمت کرنا ہے،ہمایوں اختر خان

فیصل آباد/تاندلیانوالہ( نیوزڈیسک)استحکام پاکستان پارٹی کے سینئر نائب صدر ہمایوں اختر خان نے کہا ہے کہ ہمیں ہار جیت سے کوئی غرض نہیں ہماری سیاست کا واحد مقصد حلقے کی عوام کی خدمت کرنا ہے اور اس کیلئے میں اور میرے ساتھی کوئی کسر اٹھا نہیں رکھیں گے ، میں واضح اعلان کر چکا ہوں میری آئندہ کی سیاست اس علاقے کے لئے ہے اور عوام مجھے اپنے شانہ بشانہ پائیںگے ، اس حلقے میں سازش کر کے عوامی مینڈیٹ چھینا گیا ہے ۔
ان خیالات کا اظہار انہوںنے این اے 97کے ذیلی حلقہ پی پی 103کے علاقہ کنجوانی میں علاقہ عمائدین ،اپنے سپورٹرز اور اہل علاقہ سے اظہار تشکر کیلئے منعقدہ تقریب سے خطاب کرتے ہوئے کیا ۔ ہمایوں اختر خان نے کہا کہ میرے دروازے حلقہ این اے 97کی عوام کے لئے ہر وقت کھلے ہیں ، آپ مجھے ہر کڑ ے وقت میں اپنے ساتھ پائیں گے ۔ عوام جانتے ہیںکہ سازش اور دھاندلی کے ذریعے ہماری کامیابی کو روکا گیا لیکن ہم ہرگز مایوس نہیں ہیں ، ہم نے اس علاقے کی عوام سے جو تعلق جوڑا ہے اس میں ہر گزرتے دن کے ساتھ مزید پختگی آئے گی ، ہماری جتنی استعداد ہے ہم اس سے بڑھ کر عوام کے مسائل کے حل کیلئے کوشش کریں گے۔
ہمایوں اختر خان نے کہا کہ میرا یہ ایمان ہے کہ ہر کام میں خدا کی ذات کی بہتری ہوتی ہے ، ہم علاقے کے مسائل کے حوالے سے دلجمعی سے ہوم ورک کریں گے اور ان شا اللہ وہ وقت ضرور آئے گا جب ہم بڑے منصوبوں کو پایہ تکمیل تک پہنچائیں گے ۔ حلقے کے عمائدین ، سپورٹرز اور ووٹرز نے اظہار تشکر کیلئے حلقے میں آمد پر ہمایوں اختر خان کا پرتپاک استقبال کیا ۔